कैलालीके गौरीगंगा नगरपालिकाम एकथो पुरुषके ज्यान लेहेल बघ्वा धनगढी उपमहानगरपालिका–१७ धुर्जन्नास्थित वन क्षेत्रम पुगल आशंका करल बाट । बघ्वाके आक्रमणसे स्थानीय उपभोक्ता कृष्ण चौधरीके मृत्यु हूइल घटनापाछ डिभिजन वन कार्यालय कैलालीके टोलीहूक्र बघ्वाके खोजी ओ निगरानीहे तीव्रता देहेल रल । 
खोजीके क्रमम आइतबार दिनके धनगढी–१७ के सिद्धबाबा सामुदायिक वन ओ भारताल साझेदारी वन क्षेत्रम बाघ्वाके नयाँ पाइला अर्थात् ‘पगमार्क’ फेला परल वन कार्यालयहूक्र जनाइल बाट । 
गौरीगंगा–६, धनगढीके वडा नम्बर १६ ओ १७ लगायतके वन क्षेत्रम बघ्वाके चहलपहल देखाइल ओ नयाँ पाइला समेत देखैल आसपासक बस्तीके स्थानीयहूकन विशेष सावधानी अपनाइलाग आग्रह कर्ल बाट । बघ्वाके सम्भावित आवागमन हुइना क्षेत्र भारताल साझेदारी वन्वाके कोर क्षेत्रअन्तर्गत पर्ना धनगढी उपमहानगरपालिकाके वडा नम्बर १४, १५, १६, १७  ओ १८ के कैलारी गाउँपालिकाके वडा नम्बर ६ ओ ९ के जनप्रतिनिधिहूकन समेत घटनाबारे जानकारी करल बाट ।
डिभिजन वन कार्यालय कैलालीके टोली बघ्वाके खोजीम खटल बाट । वन क्षेत्रम बघ्वाके गतिविधि देखाइल कारण स्थानीय उपभोक्ता समूह ओ सर्वसाधारणहूकन एक्कीली वन्वम नैजैना आग्रह कर्ल बाट । ओस्तक, वन्वाके आजरपाजर बस्तीम बसोबास कर्ना स्थानीयहूकन् रातके समयम समेत विशेष सतर्कता अपनाइलाग वन कार्यालयहूक्र अनुरोध कर्ल बाट ।
वन क्षेत्रम बघ्वाके खोजी ओ निगरानीके लाग आवश्यक स्थानम थप निगरानी बढाइल ओ बाघके अवस्था ओ गतिविधिबारे थप जानकारी संकलन हूइल डिभिजन वन कार्यालय कैलालीसे जनाइल बाट ।