भोटेकोशी हुँइती त्रिशूली नदीमे गील बाढीमे पर्के सम्पर्कविहीन हूइलमध्ये हालसम्म चार हजार २७० जनाके उद्धार करल ओ चार हजार ५९९ जाने अभिन बेपत्ता रहल नेपाल प्रहरीहूक्रे जनाइल बाटै ।
प्रहरी प्रधान कार्यालय नक्सालके अनुसार बाढीसे प्रभावित तीन हजार तीन पुरुष, एक हजार २५४ महिला ओ पहिचान नैखूलल १३ जाने कैके चार हजार २७० जनाके उद्धार कर्ले बाटै ।
उद्धार कार्यहे तीव्र बनैले से फेन उल्लेख्य सङ्ख्यामे मनै अभिन सम्पर्कविहीन रहल अवस्थाहे दृष्टिगत कैके खोजी ओ उद्धार कार्यहे थप प्राथमिकता देके सुरक्षाकर्मीसहित सरकारी संयन्त्र परिचालित कर्ले बाटै । नेपाल प्रहरीके प्रवक्ता एवं प्रहरी नायब महानिरीक्षक अविनारायण काफ्लेके अनुसार उद्धार करलमध्ये तीन हजार ४५३ जनाहे ‘होल्डिङ सेन्टर’मे धर्ले बाटै । नुवाकोटमे दुई हजार ४६६, धादिङमे २६०, रसुवामे ३९८ ओ काठमाडौँमे ३२९ जाने होल्डिङ सेन्टरमे रहल बाटै ।
विनासकारी बाढीमे पर्के ज्यान गुमाइल १२१ महिला, १९८ पुरुष ओ पहिचान नैखूल २६२ कैके ५८१ जनाके शव जमिनमे गाडके व्यवस्थापन कर्ले बाटै । कलेसे ५६ थो शव मृतकके परिवार ओ आफन्तहे हस्तान्तरण करल प्रहरीहूक्रे जनाइल बाटै ।
प्रहरी प्रवक्ता काफ्लेके अनुसार हालसम्म एक हजार १० जनाके शव फेला परल बाटै । फेला परल शवमध्ये ३० बालक, ३५ बालिका, २०९ महिला, ३८५ पुरुष ओ ३५१ जाने आंशिक अङ्गसहितके रहल बाटै । शवके पहिचान ओ व्यवस्थापनके प्रक्रिया फेन सँगसँगे आघे बढाइल प्रहरीहूक्रे जनाइल बाटै ।
दुई हजार ३१२ पुरुष ओ ३६८ महिला कैके दुई हजार ९८० नेपाली, विदेशीतर्फ २५१ पुरुष ओ ३३० महिला कैके ५८१ ओ फोनसे टिपाइल एक हजार ३२९ जाने बेपत्ता अवस्थामे रहल बाटै । बाढी प्रभावित क्षेत्रमे खोजी, उद्धार, शव व्यवस्थापन ओ बेपत्ताके विवरण सङ्कलनहे निरन्तरता देहेल प्रहरीहूक्रे जनाइल बाटै । भोटेकोशीमे गील अकल्पनीय बाढीसे रसुवासहित नुवाकोट, धादिङलगायतके क्षेत्रमे भारी जनधनके क्षति हूइल विषम परिस्थितिमे उद्धार, राहत वितरण ओ पुनस्र्थापनातर्फ उच्च प्राथमिकताके साथ समन्वयात्मक ढङ्गसे सरकारी संयन्त्र अहोरात्र क्रियाशील रहल प्रहरीहूक्रे स्पष्ट पर्ले बाटै ।
