धनगढीः सुदूरपश्चिम प्रदेश सरकारके बजेटमे देखाइल बेथिति छानबिन कर्ना निर्णय कार्यान्वयनमै अलमल हुइल बा । छानबिन प्रतिवेदन बुझैना समयसीमाके दुई दिन किल बाँकी रहलसमेत संसदीय समिति गठन हुइ सेकल नैहो । 
प्रदेशसभासे बजेट पारित कर्ना क्रममे बजेटमे देखाइल बेथिति छानबिन कर्ना सात सदस्यीय संसदीय समिति गठन कर्ना निर्णय सुनाइल रहित । गत २७ असोजमे बजेट पारित  सभामुख भीमबहादुर भण्डारी प्रदेशसभा बैठकमै दलीय प्रतिनिधित्वके आधारमे समिति गठन कर्ना घोषणा कर्ले रहित । सहमतिअनुसार २० कात्तिकभित्रर समितिसे छानबिन प्रतिवेदन बुझासेकपर्ना  । तर, प्रतिवेदन बुझैना मिति एैना दुई दिन किल बाँकी रहल समेत समिति गठन हुइ नैसेकल हो । 
संसदीय छानबिन समितिमे सत्तारुढ नेकपा ओ नेकपा एमाले आपन सदस्यहुकनके नाम टुंगो लगाइल बाटै । एमाले संसदीय दलके नेता ओ पूर्वमुख्यमन्त्री राजेन्द्रसिंह रावल ओ प्रमुख सचेतक एवं पूर्वमन्त्री सुरेन्द्रबहादुर पालहे समितिमे पठैना निर्णय कर्ले बाटै । अस्तके, नेकपासे पूर्वमन्त्री नरेशकुमार शाही, कैलाश चौधरी ओ लक्ष्मी विकके नाम टुंगो लगाइल बाटै ।
यहा, प्रमुख प्रतिपक्षी कांग्रेस ओ राप्रपा आप्नहुकनसँग पर्याप्त छलफल नैकैके समिति गठन प्रक्रिया आघ बढाइल कैके समितिमे सहभागी नैहुइना अडान लेहेल बाटै । बजेट पारित कर्ना क्रममे ओ समितिके कार्यक्षेत्र निर्धारण कर्नासमेत आप्नहुकनसँग परामर्श नैकरल उहाहुकनके असन्तुष्टि बा ।

बजेटमे समावेश हुइल विवादित योजना पहिचान कैके छानबिन प्रतिवेदनके आधारमे पूरक बजेट लन्ना सहमति हुइल रहे । तर, छानबिनके जिम्मेवारी पैना समिति नै गठन नैहोके बेथिति पहिचान ओ सुधार कर्ना योजना अन्योलमे परल बा ।
सुदूरपश्चिमके बजेटहे लेके सत्तारुढ दलभित्रर विवाद चर्कलपाछे संसदीय छानबिनके सहमति जुटल रहे । बजेट निर्माणमे बिचौलियाके प्रभाव परल , कमिसनके खेल हुइल ओ पहुँचके आधारमे योजना छनोट करल कैके सत्तारुढ दलकै सांसदहुक्र प्रश्न उठाइल रहित । बजेट पारित कर्ना आघे बैठल नेपाली कम्युनिस्ट पार्टी (नेकपा) संसदीय दलके बैठकसे तीन महिनासे बजेट शून्यता अन्त्य कर्ना बजेट पारित कर्ना, तर ओम्ने देखाइल कैके बेथिति छानबिन कैके पूरक बजेट लन्ना निर्णय कर्ले रहित । सत्ता साझेदार नेकपा एमाले फेन उक्त निर्णयमे सहमत होके किल नेकपाका सांसदहुक्र बजेट पारित कर्ना तयार हुइल रहे ।
अस्तके, छानबिन समिति गठनबारे छलफल कर्ना सभामुख भण्डारी आज सर्वदलीय बैठक बोलाइल बाटै । सभामुख बोलाइल बैठकमे सहभागी हुइना ओ संसदीय छानबिन समितिमे प्रतिनिधि पठैना विषयमे निर्णय कर्ना नेपाली कांग्रेस फेन आज संसदीय दलके बैठक बोलाइल बाटै ।